Aste honetan abiatu da Donostiako San Telmo Museoan Ura, ibaiak eta herriak izeneko erakusketa. Maiatzaren 31ra bitartean, ikusteko aukera egongo da.
Uraren krisiak asko egingo du okerrera hurrengo urteetan. Populazioa eta poluzioa handitu egingo dira eta, ondorioz, gaur egungo inertziari segitzen bazaio, ur-baliabideak murriztu besterik ez dira egingo. Klima-aldaketak, gainera, txarra okertu egingo omen du.
Nazio Batuen arabera, pertsonako dagoen ur-kantitatea heren bat murriztuko da hurrengo hogei urteetan.
Uraren inguruan sortutako arazo eta gatazken giza ikuspegia ematen duen argazki erakusketa da honakoa. Zuzeneko testigantza eta irudiez baliatuta, eragina jasan dutenek estatistika hotz izateari utzi eta bere larritasunak, arrazoiak eta esperantzak helarazten dizkigute.
Erakusketarekin lotutako mahai inguruak eta uraren eta ingurumenaren gaia lantzeko haurrentzako jarduera ezberdinak ere programatu dira.
Uraren arazoaren gaineko datu eta informazio gehiago, webgune interesgarri honetan duzue.
