Bilboko Tartean Teatro eta Alanbike konpainiek Nafarroako Antzerki Eskolan burutzen ari den Irrizikloa ekimeneko ateak ixteko ardura izango dute gaur, martxoak 12, 20:00etatik aurrera. Edizio honetan euskarazko antzerkiko udal-zikloak zazpi ekoizpen taularatu ditu, otsail eta martxo artean egin diren bost saiotan, eta ohikoa denez, Nafarroako Antzerki Eskolarekin elkarlanean.
Aipatutako euskarazko umore-zikloa gaur amaituko da, eta amaiera ona izateko bi saio programatu dira: Tabernaria. Instrukzioak botatzeko ondo bat kaña ikuskizuna eta Komunak pieza. Patxo Telleriak idatzi eta zuzendutako lan da Tabernaria. Instrukzioak botatzeko ondo bat kaña ikuskizuna, eta bertako aktore nagusia Mikel Martinez da. “Establezimenduko jabeak ohiko bezeroei kaña bat nola zerbitzatu behar den azaltzea erabaki du, baina askoz harago joango da, eta bakarrizketa horretan, tabernariak bere beldurrak eta nahiak aditzera emango ditu, gizarte-eztabaidarako gai jakingarriak ere mahaigaineratuz”.
Bigarren pieza 20 minutu ingurukoa izango da eta Irati Agirreazkuenaga eta Arantzazu Sanz antzezleen eskutik etorriko da: Komunak. “Bi neska, Nekane eta Miren, elkarrekin sartzen dira komunetara. Horrek badu zerbait ez ohikotik: bat-batean egin dute topo eta ez dira adiskideak, nahiz eta elkar ezagutzen duten, eskola berean ikasi zuten eta”.
