Adiorik ez izeneko pieza da La Dramática Errante konpainiaren azken produkzioa. Bihar, urtarrilaren 23an estreinatuko da Arriaga Antzokian. Maria Goiricelayak idatzi eta zuzendu du lana, eta Ane Pikaza, Aitor Borobia, Loli Astoreka, Patxo Telleria, Egoitz Sanchez eta Idoia Merodiok antzeztuko dute. Gaztelaniazko bertsioa Ni flores, ni funeral, ni cenizas, ni tantán, hilaren 24an eta 25ean izango da.
La Dramática Errante konpainiaren laugarren obra aurkeztuko da hori, zainketa aringarriak eta ongi hiltzea ardatz dituena. Bertako protagonistek, aita eta alaba batek, Santi eta Ane Juaristik (Patxo Telleria eta Ane Pikaza), Donejakue bidean zehar egiten duten bidaia baten alegoria bat da. Hortaz, muntaiak bidaia bat proposatzen du Donibane Garazi, Orreaga, Burgos, Castrojeriz eta La Cruz do Ferro zeharkatuz, Santiago de Compostelara iritsi arte. Antzezlanak “heriotzari buruz hausnartzera gonbidatzen gaitu, baita pertsona bakoitzak bere egunen amaierari aurre egiteko duen moduari buruz ere, umorearen, samurtasunaren eta gizarte-kontzientziaren bidez”.
Piezan Estudio Gheadak eta Igor García Piñasek Donejakue bidean bertan grabatutako ikus-entzunezko materiala ere ikusiko da. Eszenografia David Pascualek sinatu du.
La Dramática Errante konpainiako ohiko taldea izango da: David Alcorta argiztapenean, Ibon Agirre soinu espazioan, Ibon Belandia musika-konposizioan, Daniel F. Carrasco jantzietan eta Alberto Ferrero koreografietan.
Arriagan estreinatu ondoren, obrak bira bati ekingo dio.
