Azkuna Zentroak Gutun Zuria antolatu du apirilaren 2tik 6ra Gaur gauean suak nire liburutegia erreko balu. Artea kontatzeko artea tituluarekin. Jaialdia gaur arratsaldean hasiko da (Auditorium, 19.00etan) Lars Gregersen artistaren Sisyphus Ascending pieza artistikoarekin antzezpenarekin, Ivan de la Nuez eta Veronica Gerberen arteko solasaldiarekin, eta Maialen Lujanbioren hitzaldiarekin. Edizio honetan “hitza eta literatura liburuen orrietatik harago doaz eta beste diziplina artistikoekin elkarrizketatzen dira”, adierazi du Azkuna Zentroko zuzendaria den Fernando Perezek.
Gaur gauean suak nire liburutegia erreko balu. Artea kontatzeko artea tituluak jaialdi honek duen helburua hartzen du. “Lehen zatiak Aldous Huxleyren saiakera du abiaburu, Huxleyk argudiatu baitzuen liburutegi bat erretzea alferrikako ekintza dela, liburuak berriz irakurri eta eduki ahal direlako. Bigarren zatiak, berriz, Jose Lezama Lima poetak ahozko arteari buruz idatzitako testu bat du aipagai”.
Gaur, Maialen Lujanbio arituko da, eta bertsolaritza eta artearen beste diziplina garaikideen arteko zubien inguruko hitzaldia egingo du.
Gutun Zuriaren aurtengo ekitaldian hainbat tailer gauzatuko dira; adibidez, Veronica Gerber Bicecci artistak Hitzak suntsitzea ederra da saioa zuzenduko du; Sorkuntza artistikoko tailer bat ere egongo da, Irudiak eta hitzak: Bestelako ikuspegia, eta dibertsitate funtzionala duten pertsonei zuzenduta izango da.
Ohi den bezala, gaurko literatura garaikidearen erreferente diren hainbat idazle bilduko dira egun horietan Bilbon. Euskal literaturaren ordezkariak Harkaitz Cano, Xabier Gantzarain, Eric Dicharry, Danele Sarriugarte eta Beatriz Chivite izango dira, besteak beste.
Joan Fontcuberta, Espainiako Argazkilaritza Saria; Cristina de Middle, Espainiako Argazkilaritza Saria eta Photo Españako komisarioa, eta Valerie Mrejen, Europako ikus-entzunezko adituen artean elkarrizketa bat ere antolatu dute.
Oskar Alegria, Bernardo Atxaga, Agustin Fernandez Mallo, Carlos Fonseca, Alicia Kopf, Juan Vico eta Enrique Vila-Matas idazleak oholtzara igoko dira ikusleen aurrean mintzatzera. Eta gauez, Atarian, Rafael Lechowski rap abeslariaren kontzertua ospatuko da. Eta Christina Rosenvinge abeslariak azken diskoa eta memoriak aurkeztuko ditu.
Hori eta askoz gehiago, hemen kontsultatu ahal duzuen programazioan.
