Bilboko Udaleko Gazteria eta Kirol Sailak 28. Bilbao Hiria Pop-Rock Lehiaketan izena emateko epea amaitzear dago, maiatzaren 12an itxiko da. Ohi denez, taldeak hiru kategoriatan lehiatuko dira: Pop-Rock, Metal eta Elektronika & Beste joera batzuk.
Sarien harira, orotara, 20.000 eurotik gora banatuko dituzte. Pop-rock eta Metal ataletan hauexek izango dira sari nagusiak: Lehenengoari, 5.000 euro; bigarrenari, 2.500 eta hirugarrenari, 1.200. Elektronika sailean, berriz, sari bakarra izango da, 2.200 eurokoa. Epaimahaiaren sari berezia ere izango da, 1.100 euro.
Horretaz gainera, bestelako sariak ere izango dira: Kontzertuak Bilbon (Aste Nagusian eta Bilborock aretoan) eta beste jaialdi batzuetan ere (Azkena Rock Festival, Ebrovisión); musika tresnak irabazleentzat, etab.
Lehiaketan parte hartu nahi duten taldeek ondokoak bidali beharko dituzte: Hiru doinu mp3, ogg edo wma formatuan; argazki bat jpg, bmp edo png formatuan eta taldearen ibilbidea doc, docx, odt edo pdf formatuan.
Informazio guztia: concursovilladebilbao.com.
