Bihar eta etzi izango da gurean Maria Xose Silvar Ses, Bilboko Kafe Antzokian eta Oiartzungo Pagoa Kafe Antzokian hurren hurren. Bi emanaldiotan, galiziarra bandarekin arituko da, Opoñerse á extinción bere laugarren diskoa aurkezteko xedez.
Sesek askotariko sonoritateak lantzen ditu: batetik, blues sustraidun rock elektrikoak bultatutako kantuak eta bestetik, Latinoamerikako kantautoreen ondaretik edaten duten doinuak. Horretaz gaienera, bere herriko tradizioari ere erreparatzen dio.
Bere laugarren diskoa, Opoñerse á extinción, horren guztiaren isla da. Baga Biga promotoreak iragarri duenez, “ (diskoa) batez ere, rocka eta bluesaren uztarketa da. Baina musika esparru gehiago laztanduko ditu sentimenduz beteriko ahots indartsuarekin, ukitu eklektikoarekin (zertzelada latindarrak, tex-mex, galiziar doinuen distirak…). Ses kantariak kemen izugarria du, inkonformismoa eta pasioa”.
Kantuen hitzetan sentimenduak eta gai sozialak biltzen ditu, maitasuna eta salaketa.