Bilboko Euskararen Etxeak eta Bizkaiko Foru Aldundiko Euskara, Kultura eta Kirola Sailak antolaturiko Hi(ZKI)bridoak. Literatura Mutanteak zikloak bost ekitaldi bilduko ditu, eta gaur izango da lehen hitzordua. Irailetik abendura bitartean literaturaren eta ahozkotasunaren inguruan ardazten den ekimenaren bigarren edizioa egingo dute Bilboko Euskararen Etxean. Aurtengo protagonistak Ibon RG eta Anari musikariak, Mirande musika-egitasmoa, Uxue Alberdi idazle eta bertsolaria, Danele Sarriugarte idazlea eta Onintza Enbeita eta Miren Artetxe bertsolariak izango dira, besteak beste.
Diogun moduan, gaur berton, irailak 23, literatura mutantearekin izango da lehen zita oMorruMU baMat izeneko saioaren bidez. Joxan Artzeri omenaldia egiteko asmoz, 2018ko udazkenean hasi ziren IbonRG eta Enrike Hurtado musikariak, ohiko dituzten lanabesekin lanean. Ibonek Artzeren hainbat olerki abiapuntu hartuta sortutako kantuak Enrikek berak sortutako software esperimentalekin uztartu ziren. Egun horretan emaitza ikusgarria.
Hurrengo saioa urriaren 7an izango da. Uxue Alberdiren Dendaostekoak azken lan literarioan oinarritutako bertso-saio literarioa egingo dute Uxuek berak eta Onintza Enbeita eta Oihana Iguaran bertsolariek. Aitor Nova saxofonistak musika jarriko du.
Urriaren 29an, Elena Setien (ahotsa eta teklatuak), Xabier Erkizia (elektronika) eta Grande Days taldea bilduko dira Miranderen figura gogorarazteko. Pieza Jon Miranderen olerkietatik abiatutako musika-egitasmoa da.
Azaroaren 11n, Miren Artetxe, Eli Pagola eta Jone Uria (bertsolariak), eta Danele Sarriugarte eta Arrate Hidalgo bilduko dira zientzia fikziozko bertso saio bat inprobisatzeko.
Eta azkenik, abenduaren 17an, Anariren Habiak diskoan oinarritutako arte erakusketa kolektiboa abiatuko da. Bertan, Anarik disko horretako zenbait kantu joko ditu.
