Peiremans + proiektuak bigarren EPa aurkeztu du, lehenengo EPa plazaratu eta hamar urtera: Bigarren saria. Diskoak, aurrekoak bezala, bost kantu biltzen ditu. Diskoak taldearen ohiko ezaugarriekin ondutako bost doinu biltzen ditu, pop melodiak eta gitarra gihartsuak.
Gorka Urbizu taldekidearen hitzetan, eta egitasmoaren izen futbolzalea aipatuz honakoa bota du: “(Disko berria) Partidaren luzapena da, eta ez da penaltirik izango”. Hortaz, martxoaren 19an, Durangoko Plateruenan egingo duten kontzertu bakarrera joateko deia egin du.
Peiremans Gorka Urbizu, Imanol Ubeda, Haritz Beristain eta Marino Goñik abiatu zuten duela hamar bat urte, urgentzia handiko pop kantuak haizatzeko. Bada, iragan azaroan, taldearen hamargarren urteurrenaren harira, taldekideak elkarri xaxatzen hasi ziren Twitter bidez afari bat egiteko asmoz. Bada, postrera iritsi baino lehen hamarkada beteko ibilbide hori ospatzeko zenbait kontzertu egingo zituztela erabaki zuten.
Emanaldiok iazko azaroan egin ziren, eta jasotako harrera bikainaren ondorioz, “gure harridurarako”, kantu gehiago egitea erabaki zuten. “Orain hamar kantuko errepertorioa daukagu”, nabarmendu du umoretsu Gorkak.
Hala, azaroko festa giro haren emaitza da Bigarren saria, zeinak Karlos Osinagarekin grabatutako bost kantu biltzen dituen. “Ekoizpen aldetik, aurrekoa baino sendoagoa da, urte guzti hauetako eskarmentuaren ondorioz”, azaldu du Gorkak. Letrak aurrekoaren ildo beretik doaz. “Batzuk jostalariak dira, ironikoak; beste batzuk, berriz, sakonagoak”, esan du Imanol Ubedak. Aipagarria da Zortziak bat doinua, 1938an AEBetako Idahon aurkitutako bertsopaper batean oinarritua. “Euskanglish-edo batean abestua”, esan du Urbizuk.
Aipatzekoa ere bada, Gorka Gondrak egin duen diskoaren diseinu bikaina. “Instagram bidez ezagutu genuen, eta bete-betean asmatu du”, argitu du Gorkak. “Behin grabatzen hasita, zerbait duina egin nahi genuen”, gaineratu du Imanolek. Diskoa Internet bidez eskura daiteke, bai eta kontzertuetan ere. Gero, agian, saltokietara iritsiko dira, “sobratuz gero”.
Taldearen xedeetako bat ondo pasatzea dela aintzat hartuta, pop estiloaren aldarrikapena egin du Imanolek, eta erritmo horiek jotzen zituzten zenbait talde ere aipatu ditu: Baleri Balerdi, Baneteuanba… “Gorka eta biok Balerdi Balerdiren zale sutsuak gara aspalditik, eta Marino Goñi gurekin izatea, taldeari justizia egitea ere bada”. Pop estiloarekin, gainera, gero eta aurreiritzi gutxiago daudela nabarmendu du Ubedak.
Dena dela, taldearen behin-behineko izaera azpimarratu du Berri Txarrak taldeko buruak. Hala, bigarren etapa honen bigarren eta azken fasean, hiru kontzertu baino ez dituzte egingo: Martxoaren 17an, Madrilgo Moby Dick aretoan; martxoaren 18an, Bartzelonako Apolo aretoan; azkenik, aipatutako Durangoko kontzertua, Ekizarekin batera, martxoaren 19an. Gero, taldea hibernazioan lotuko da.
