Gaur goizean, Xabier Ochandiano Bilboko Udaleko Ekonomi Garapen, Merkataritza eta Enplegu Saileko zinegotzi ordezkariak eta Alfonso Santiago Last Tourreko zuzendariak datorren astean, uztailaren 12, 13 eta 14an egingo den Bilbao BBK Live musika-jaialdiaren nobedaderik behinenak aurkeztu dituzte.
Ia ehun taldek hartuko dute parte Kobetamendiko jaialdian, horretarako propio altxatuko diren zazpi agertokitan. Nabarmenak ezagutuko dituzue: Florence + The Machine, Gorillaz, The xx, The Chemical Brothers, My Bloody Valentine edo Childish Gambino. Euskadiko eszenako hainbat ordezkari ere izango dira bertan: Cecilia Payne, Hakima Flissi, Ibon Errazkin, Borrokan eta Aneguria.
Gaur goizeko agerraldian hainbat datu eman dituzte antolatzaileek, eta hala, jakinarazi dute jaialdiari hasiera emateko astebete falta denean, kanpineko sarrerak dagoeneko agortu egin direla, eta azken bonuak ere saltzen ari direla egunotan. Salmenta oso “nazioartekoa” ere izan da, eta aurten, 120 herrialde baino gehiagotatik erosi dira sarrerak (Erresuma Batua, Frantzia, Italia, Alemania edo Ameriketako Estatu Batuak).
Espazioei begira, musika elektronikoaren zaleen plaza Basoa izango da, eta aurten Lasai espazio berriak osatuko du. Beste aldetik, Akelarre izeneko espazio bat estreinatuko da, kanpalekuan daudenentzat (Kanpalekuko sarrerak ere agortu egin dira!) eskainia soilik.
Nabarmendu behar da ahalegin handia egiten dela Kobetamendi eremu jasangarri bilaka dadin, eta aurten sastar gutxiago ekoizteko konpromisoa zabaldu nahi dute; horretarako hainbat neurri hartu dituzte: berrerabili daitezkeen edalontziak, birziklatzeko edukiontzidun garbiguneak areagotzea eta jaialdiaren aplikazio ofiziala sustatzea, hartara, papereko informazioa murrizteko eta cashless aukera sendotzeko.
Garrantzi handia duen beste konpromiso bat “eraso sexistarik gabe”-ko aldarriarekin egingo dute, eta horretarako diseinatutako Eraso Sexistak Prebenitzeko Kanpaina bat aurkeztu dute Ez beti da Ez. No es no leloarekin, jaialdia espazio librea eta berdinzalea dela adierazteko. Horretarako, informazio-gida bat argitaratu dute euskaraz, gaztelaniaz, ingelesez eta frantsesez, eraso sexistak nola identifikatu eta horien aurrean zer egin behar den azaltzeko.
Kontzertuei begira Florence + The Machine, osteguneko kartel-burua izango dira. Ostegunean ere, alt-J eta Childish Gambino izango dira oholtza gainean. Ostiralean, The XX, The Chemical Brothers eta My Bloody Valentine arituko dira. Eta Damon Albarn eta Jamie Hewlett musikariek sortutako Gorillaz, larunbat gauean izango da zaleen aurrean.
Horrez gain beste mila kontu antolatu dituzte egun musikal zoro haietarako: Bereziak Zikoa jaialdia Bilboko kaleetan; Night + Day Bilbao programazio berezia The XX taldearen eskutik, eta abar.
Betiko legez, kontzertu guztiak, edo noiz , non eta nortzuk jakiteko: Bilbao BBK Live .
