Gorliz herrian kokaturik dagoen Xurrut lokalean Ostegunak musika zikloa abiaraziko dute etzi, hilak 1, Jurgi Ekiza musikariarekin.
Uztailean eta abuztuan luzatuko da aipaturiko zikloa, eta mota askotako musikariek hartuko dute parte, tartean, Sonic Trash, Diobite, edo Omago.
Baina lehen ostegun honetan Willis Drummond taldeko gitarra eta abeslari Jurgi Ekizak (Baiona, 1980) hartuko du parte. 2016an kaleratu zuen Ekiza (Bidehuts) bere bakarkako ibilbidearen estreinako urratsa. 2017an, halaber, 2016/IX/04 izenburuko bigarren lana plazaratu zuen eta single bat ere kaleratu zuen Presondegia, itsaso zakar bat, 2017an. Hainbat tokitan ibili da lan horiek haizatzen.
Ekizak bere unibertso pertsonalena, biluziena, islatzen du bakarkako egitasmoan. Hala, bakarka egindako kantuetan garapen luzeak nagusitzen dira, tarte lasai eta intentsuagoak uztartuz. Askotan, une kasik isiletan ere murgiltzen da. Entzunaldi aunitz exijitzen dio entzuleari, eta kantautore giroak eta rock pasarteak lotzen ditu.
Anari musikari azkoitiarrak hauxe idatzi zuen Ekiza diskoaren harira: “Norbait begien aurrean biluzten denean, norbaitek dena erakutsi nahi dizunean, beste aldera begiratzen duzu. Ez gaude ohituta biluziari aurrez-aurre begiratzen. Gordina da, benetakoa, benetakoegia da, beroegia, hotzegia. Horrelako zerbait gertatzen da Jurgi Ekizaren diskoarekin”.
Jurgik ez dio bere buruari mugarik jartzen bakarrik aritzen denean, eta kantuak eta hitzak egiterakoan, bat-batekoari erreparatzen dio gehien; alegia, espontaneoki aritzen da barruan daukana azaltzeko.
Ostegunak zikloaren gaineko datuak Xurrut-ek dauka.
