Apirilaren 13an Ostiral multi-musikala izeneko ekimena egingo dute Getarian; bariku horretan bi kontzertu interesgarri ikusi ahalko dira Gipuzkoako kostaldeko herrian.
Hala, 20:00etan, Harralde tabernan Tostadas izeneko taldeak joko du. Gitarra eta pianoz osatua, Madrileko taldeak proposamen iradokitzailea eramango du Getariara. Bikoteak giro intimistak sortzen ditu akorde hauskor eta lasaien bidez; ukitu malenkoniatsua ere isurtzen du. El Hombre del Tiempo diskoa argitaratu dute eta haien webgunean osorik entzun daiteke.
Proposamen multi-musikala Gaztetxetik igaroko da. Izan ere, 22:30ean, Ten Volt Shock eta Inserta taldeek joko dute. Lehenengoak Alemaniatik datoz eta bigarrenak berriz, Bilbotik.
Alemaniarrak noise-rock estiloa jorratzen duen hirukotea da eta taldekide artean Kurt taldeko musikariak daude. Alemaniarrek 78 Hours lana aurkeztuko dute.
Inserta bilbotarrak, aldiz, post-hardcorearen eremuan mugitzen dira, eta giro eta intentsitate ezberdinak jorratzen dituzte.
