BilbaoArte Fundazioak 2021ean bekaduna izandako Gin Ro artista mexikarraren El otro lado del jardín erakusketa ikusgai jarri du.
Gin Roren lanaren gai nagusia identitatearen aldatzea da, hainbat prozesu sozial, ekonomiko eta historikotan oinarrituta, hala nola kolonialtasunean eta globalizazioan. Oraingo honetan, “erakusketa aretoak hiru zatitan banatutako instalazio batekin beteko da, argazkia, serigrafia eta zeramika euskarri desberdinetan konbinatuz, kolonialismoaren ikuspegitik Espainiaren eta Latinoamerikaren arteko harremana aztertzeko”.
Urazurrutia Aretoan aurkezten den lehen prozesuak No lugar du izena (stop motion formatuko bideo bat) eta artistaren subjektibotasunetik abiatuta garatzen da. Bigarren prozesua handiena da, Esquejes. “Espainiatik Abya Yalara (Amerika) egindako lehen espedizio zientifikoen artxiboa gurutzatzen du, latinoamerikar jatorriko migratzaileen eta Latinoamerikatik joandako landareen argazkiekin”.
Azken prozesua Mal de Ojo da, Abya Yala emakumeetan zentratutako instalazio bat, aurreko proiektuko espedizioen artxibo beretik abiatuta.
Martxoaren 25ean erakusketaren katalogoa aurkeztuko du artistak, Federico Pallanidorekin batera argitaratu eta diseinatua. Testu nagusia Alba Rodriguez Diazek, arrazakeriaren aurkako idazle feministak, sinatu du.
Gin Ro artistak (Georgina Rodríguez Ayala) (Mexiko, 1986) 2014tik, argazkigintzaren azterketa teknikoan eta kontzeptualean sakondu du. 2017an, ohorezko aipamena jaso zuen Roberto Villagraz Bekan (EFTI, Madril), eta horrekin egin zuen EFTIren Argazkigintza Garaikideko eta Belaunaldiko Proiektu Pertsonaletako Masterra (2017-2018). Gaur egun, Arte Bisualetako Maisutza ikasten ari da, Argazkigintzako espezialitatearekin, UNAMen (Mexiko).
