Bilboko Fas zineklubak Šarunas Bartas zinegile lituaniarrak zuzendu eta idatzitako Peace to us in our dreams (2015) pantailaratuko du gaur, El Carmen aretoan, 19:45ean. FICXixon Nazioarteko Zinemaldiaren zuzendari ohi Nacho Carballok aurkeztuko du emanaldia.
Hiru pertsonaia eta paisaia dira filmaren elementu nagusiak. Fas zineklubaren arabera, “Lakuak eta basoak, espazio ederrak eta hiru pertsonaiaz baliatzen da Sharuna Bartas”.
Aita alarguna, haren bikotekidea eta lehenengoaren alaba nerabea dira pertsonaia horiek. “Aitaren paperean Bartas bera dugu, eta alabaren edertasun paregabea (Ina Marija Bartaité) erabiliko du bizitzaren aspektu filosofikoez hausnartzeko”.
Inguru zabal eta eder batean garatzen den film barnerakoia da Peace to us in our dreams. Oso film pertsonala da, zintzotasunez josia, atmosfera tristeak eta irudi politak tartekatzen dituena.
Informazio gehiago: cineclubfas.com.
