Gernikako Audience taldeak Amerikanuak film luzea musikatuko du zuzenean bihar, hilak 24, Kultur Leioan, Auditoriumean, 21:00etan. Orotara, AEBetako musikaren sustraietan oinarritutako 19 kantu joko dute gernikarrek.
Boskote gernikarrak Amerikanuak filmaren soinu banda idatzi du eta bihar Leioan aurkeztuko du zuzenean. Filma, halaber, Nacho Reig eta Gorka Bilbaok zuzendu dute, eta Donostiako 58. Nazioarteko Zinemaldian estreinatu zen, Zinemira sailean. Dokumentalak Euskal Herritik Elkonera (Nevada) joandakoen bizitza du ardatz.
Audiencek blues, country, eta folk doinuetan bustiriko 19 rock pieza joko ditu. Horretarako, hamaika instrumentu erabiliko dituzte, hala nola, gitarrak, biolina edo steel guitar-a.
Emanaldian, “musika amerikarraren erroak eta aukera berrien bila joandako pertsonen istorioak bat egiten dute. Estilo ariketa bat eta bakarra da, eta musika pasarte horietan oinarrituz, musika bera nabarmendu egiten du”.
