Maiatzaren 20tik ekainaren 3ra bitartean, DNA 2017 – Nafarroako Dantza Garaikidearen Jaialdia egingo da bederatzi udalerritan: Iruñea, Barañain, Huarte, Noain, Atarrabia, Lesaka, Aoiz, Altsasu eta Tutera.
Hala, igandean, maiatzak 21, DNA Nafarroako Dantza Garaikidearen Jaialdiak Eduardo Fukushima brasildarraren Homem Torto ikuskizuna aurkeztuko du Iruñeko Baluarteko Areto Nagusian, 18:00etan.
Baluarteren arabera, “Homem Torto dantza asimetriko ikuskizuna da, bertan gorputz indartsuen kemenaz hornitutako gorputz ahula aurkezten da. Sortze hau aurkakoen enfrentamendua du oinarri: gogortasuna eta gozotasuna, ahultasuna eta indarra, publikoarekin hurbiltasuna eta urruntasuna, oreka eta desoreka, mugimenduaren arintasuna eta haustura, gorputzaren barnealdea eta kanpoaldea”.
Baluarten, halaber, bigarren ikusgarri bat izango da igandean, 20:00etan: Gilles Jobin suitzarraren Força Forte. “Pantailan proiektaturiko gorputz birtualak benetakoak bihurtzen dira oholtza gainean Suitzako The Young Gods musika talde mitikoko buru Franz Treichler-en jatorrizko musikak lagundurik”
Larunbatean hasiko da baina, jaialdia: Uharteko Uharte Zentroan, coLABoratorio konpainiak Aperitifak aurkeztuko du, 12:00etan. Iruñean, berriz, bi emanaldi izango dira: 17:00etan, Katakrak gunean, Kataluniako Societat Doctor Alonsok Anarchie antzeztuko du, eta 20:00etan, Baluarten, Taiwango Cloud Gate Dance Theatre konpainiak Rice eskainiko du. Azkenik, Altsasuko Iortia Kultura Gunean, 20:00etam, Kukai Dantzaren Oskara Plazara ikusi ahalko da.
Egitarau osoa hemen.
