Nontzeberrik bere udako atsedena hartuko du aste batzuetan, baina hala ere bere edukiak eskuragarri izango dituzue, oporretan zabalik balego legez. Nontzeberriren atal guztiez gozatu ahal izango duzue oporretan ere.
Hala, Albisteen atalaren baitan, Ezleku bat duzue. Bertan, webgunean agertu diren azken elkarrizketak eta kolaborazioek hausnartzeko bazka luzatuko dizuete. Bertan musika taldeei egindako galderak, eta bestelako kontu interesgarriak topatuko dituzue. Baita gure bi kolaboratzaileen testuak ere: Nagore Portillo eta Zaloa Basabe.
Argazkigela diziplina horri dedikaturiko espazioa da, non bertoko argazkilariei gune bat eskaintzen diegun euren lanak erakusteko. Dozenaka argazkilarik erakusten dituzte egunero beren obrak atal honetan, guztiak dira lan interesgarriak, ikusgarriak eta kitzikagarriak. Begietarako bidaia da.
Argazkigintzarekin loturik ere Argazki Haiku duzue. Bertan irudi bat proposatzen zaizue hamabostean behin, eta irudi horrek internautari iradokitzen diona jartzen da haiku moduan. Poesia eta irudia nahasten dira modu fin batean, bat-batekotasunez, sorkuntzari hegoak emanik.
Horretaz gain, webgune berriarekin abiatu ditugun Nontze TV eta Nontzeblogosfera atalak ere bisita daitezke. Lehenengoak askotariko bideoak biltzen ditu; bigarrena, ordea, Euskal Herriko blogarien zerrenda interesgarria da.
Musikak ere bere esparrua du. Kalesound atalean denetarik topatuko duzue. Bertoko talde askoren musikak bildurik daude atal honetan, talde hauekin kontaktatzeko modua, beren biografia eta mp3 formatuko kantak. Musikarik berriena atal honetan duzue eta entzun nahi baduzue nontzeberrik irratia jarri du, bertoko talde hauen lanak entzun ditzazuen.
Eta ez hori bakarrik. Egunero dauden kontzertuen zerrenda ere jarrita dago hor, eta bertan taldeek bidaltzen duten informazio jasotzen da: eguna, non ordua eta abar.
Eta amaitzeko Nontzeberrik bultzaturiko lehiaketekin ere gozamena eskuratuko duzue Lehiaketak atalean. Esaterako, aurten Nontzefilmak 11 abiarazi dugu eta bertan ehunka film dituzue ikusteko. Hala ere aurreko edizioetako lanak ere ikusgai izango dira Nontzefilm eta Nontzeflash lehiaketetan, urte dezentez bizirik mantendu direnak.
Eta azkenik, laster batean abiaraziko dugun Bilblogari lehiaketaren webgune baduzue. Joan den urteko lehiaketa ikusteko duzue.
Segi Nontzeberrirekin udan!
