MUSIKA

Kurt Elling eta BOS, “365 Jazz Bilbao” zikloan

 

Ambrose Akinmusire tronpeta-jotzaile kaliforniarraren emanaldiarekin hasiko da 365 Jazz Bilbao programaren zazpigarren denboraldiko bigarren zatia. Kontzertu hori urriaren 15ean egingo da, Bilboko Sociedad Filarmonicaren aretoan, 20:00etan. Bilbao 700 Fundazioak ondu ohi du jazz-zikloa.

Akinmisurek 2012an grabatu zuen bere estreinako lana, When the heart emerges easier glistening, Blue Note diskoetxean, grabazio horretan jazz estiloaren mugak gainditu, eta pop melodietan jauzteko gaitasuna zuela erakutsi zuen tronpeta-jotzaile estatubatuarrak. “Konposizioetan, pertsonaiek, benetakoek nahiz alegiazkoek, ohiz kanpoko istorioak eta zirrara sortzen duten soinuak eraikitzen dituzte”.

Azaroaren 6a eta 7an, Euskalduna Jauregian, kontzertu bereziak izango dira Bilboko Orkestra Sinfonikoaren eta Kurt Elling jazz-abeslari estatubatuarraren eskutik. Nabil Shehata izango da bi emanaldi horien zuzendaria.

Elling jazz garaikideko kantari garrantzitsuenetarikoa izateaz gain, sekulako gaitasun teknikoak ditu. “Nagusitasun tekniko handia dauka maila erritmikoan, tinbrikoan, dinamikoan eta fraseatzean, eta hurbilago dago instrumentista birtuosoaren eredutik ohiko abeslariaren eredutik baino”. Shehatak, berriz, kuwaitarra jaiotzaz, munduko makina bat orkestra sinfoniko zuzendu ditu, gonbidatu gisa.

Bestalde, bertoko taldeek ere euren tokia izango dute programazioaren baitan: irailaren 26an eta 27an, Periferians, Hesperia hotelean; urriaren 24an eta 25an, Leslie Helpert, Villa Bilbao hotelean; eta, amaitzeko, azaroaren 21ean eta 22an, Daniel Amat Trio, Silken Indautxu hotelean.

Informazio gehiago: 365jazzbilbao.com.

 

Erakutsi gehiago

Antzeko artikuluak

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

Back to top button