Pet Fennec izenaren atzean Urko Eizmendi musikari donostiarra dago. Londresen trebatua, aurten argitaratuko du estreinako diskoa. Grabazio berri horren harira, Saturn Maybe izenburuko singlea plazaratu du Ham House Records diskoetxearen markapean.
Saturn Maybe gitarra melodikoekin jantzitako pop kantua da, 1990eko hamarkadako Teenage Fanclub edo Guided By Voices indie taldeen antzera. Kantua espazioaren ideiaren inguruan ardazten da; espazioa egoera zailetatik ihes egiteko irtenbide gida, hain zuzen.
Donostiako Muir Studio-n grabatu eta ekoitzi du Fennecek kantua, eta aurten kaleratuko den lehendabiziko diskoan bilduko da. Fennecek jada hainbat kontzertu egin ditu; esaterako, Kutxa Kultur Festibalean parte hartu du.
Diskoaren azala Londresko Nicholas Stevenson izeneko diseinatzaileak egin du, zeinak hainbat hedabiderentzat egiten duen lan: The New York Times, Blue Note Records edo Bloomsbury, besteak beste.
