Khea Ziater konpainiak Oymyakon: habitación 101 film eszeniko berria aurkeztu du gaur goizean, Arriaga Antzokian. Khea Ziater konpainiaren eta Alex Gerediaga sortzailearen obra, datorren astean, 28an eta 29an ikusgai izango da Arriaga Antzokian, 19:30ean.
Obra horretan minaren gestioa ikertzen da, mina espazio pribatuetan eta nola defendatzen eta kudeatzen dugun min hori. Arrate Etxeberriak, Miren Gaztañagak eta Txubio Fdez. de Jaureguik osatzen dute Bilboko konpainiaren lan berriaren, zazpigarren lanaren, antzezle taldea, eta eurek, kode zinematografikoak eta eszenografikoak nahastuz, eta musikari eta ikus-entzunezko baliabideei pisua emanez, hiru pertsonaien bakardadeak esperimentatuko dituzte, beti ere, esperientzia traumatikotik abiaturik.
Berez, ihesbidetik eskaintzen ez duen gela batean gertatuko da ikusgarria, ez-leku bat, alegia. “Pertsonaiak arima galduak dira, hotzaren eta absentziaren hiru biztanle, eta gela horretan nabarmenduko da bestearekin dugun beharra, izan ere, norbaitek entzun edo besarkatu behar gaitu beti”, azaldu du Alex Gerediagak. Bizipen horietan sortzen diren trantsituak nabarmenduko dira, sentitzen dutena ulertarazi ahala izateko, euren istorioak pisu tragiko bat baitute beti. Bertan, bestearen beharraren ondorioz euren burua agerian utziz jakin barik elkarren ondoan bizi diren pertsonaiak ezagutuko ditugu.
Izenburuak bi erreferentzia ditu. Alde batetik, Oymyakon, planetako txokorik hotzena da, eta bestetik 101 gela, George Orwellen 1984 eleberrian dagoen elementua da.
Oymyakon: habitación 101 lanean, goiko aktoreekin batera Azegiñe Urigotia, Oier Ituarte, Javi Andraka, Jesús Pueyo, Son Aoujil eta Ibon Aguirrek osatuko dute lan taldea.
Taldea gaztelaniazko bertsioarekin abiatuko bada ere, urrian euskarazko bertsioa ere haizatuko du hainbat tokitan.
