Pamiela argitaletxek bi liburu berri aurkeztu ditu gaur, apirilak 7, Donostiako Udal Liburutegiko sotoan: Oskar Arantzabalen Azpilkueta, ekonomiaren aitzindari eta Mitxelko Urangaren Eros(ki). Merkatuaren erotizazioa, erotismoaren merkatilizazioa. Biak ala biak, 2013ko Juan Zelaia sarien irabazleak dira.
Aurkezpen ekitaldian, hauexek izan dira: Oskar Arantzabal idazlea, Mitxelko Uranga idazlea, Joseba Intxausti Kulturaren Aldeko Euskal Fundazioko ordezkaria eta Jose Angel Irigaray Pamielako kidea.
Mitxelko Urangaren lanak erotismoaren merkantilizazioa eta merkatuaren erotizazioa ditu ardatz; biak batzen ditu, prozesu oso bat aztertzeko xedearekin.
Arantzabalen liburuak, berriz, Martin Azpilkueta, Doctor Navarrus, jurista eta teologoaren pentsamendu ekonomikoa jorratzen du; Azpilikuetaren gogoeta ekonomikoen inguruan egindako estreinako lana da. Horrekin batera, autoreak egungo ekonomia ere aztertu du, Azpilikuetaren pentsamendua baliatuta.
