Bilboko Kalealdia Kaleko Antzerki eta Arteen Jaialdiaren XV. edizioaren baitan, Hortzmuga euskal konpainiak Nola izenburuko ikuskizuna estreinatuko du gaur, Arriaga Antzokiaren alboko aldean, 19:00etan. Hala ere, taldeak beste saio bat egingo du hurrengo egunean, ordu berean.
Bi orduko ikuskizuna “pertsonen barne-munduen mundua da, desberdina izatea arrunta den mundua, istorio bat kontatzeko bestelako mundua”. Aforoa mugatua izango da, eta muntaiaren formatu txikiari erreparatuta, saio bakoitzean gehienez 20 pertsona bildu ahal izango dira.
Honen ostean, egitarauari jarraiki, La Salamandre talde frantziarrak suaren manipulazioan trebatutako 13 artistaren arteko Essat muntaia eskainiko du 22:30etan, Arriaga Plazan, eta Mini Compagnie taldeak (hiru akrobatak eta soinujole batek zirkua eta musika uztartuz) Enivrez-vous antzezlana taularatuko du Epalza kalearen eta Campo Volantinen arteko karrikan.
Gaur arratsaldean ere, Sivouplait talde japoniarraren Bivouac! hitzik gabeko komedia ikusteko aukera egongo da Plaza Barrian; Daad konpainia nederlandarrak La cuisine macabre aurkeztuko du Areatzan; Manolo Alcantara kataluniarrak malabarismoa, ekilibrismoa eta dantzak egingo ditu Areatzan; Monkey Style frantziarrek puxiken manipulazioak egingo dituzte Plaza Barrian, Babyllon lanarekin; eta Sacekripa talde frantziarrak Marée basse eskainiko du Areatzako karpan, 2 euroko prezioan.
