Bilboko MEM (Musica Ex Machina) jaialdiak martxorako prestatu duen egitaraua iragarri du. Hala, ostiralean, Bizkaiko hiriburuan dagoen Sarean lokalean, inprobisazioan oinarritutako jam musikala izango da, 10:00etatik aurrera. Horrekin batera, 23:00etan, Edu Comelles musikariak musika esperimentaleko saioa egingo du.
Martxoaren 12an, larunbata, Toño Cabanelas-ek VR: Immersive 360 izenburuko tailerra zuzenduko du Sarean lokalean, 13:30ean. “Argazkigintzaren eta bideogintza 360-ren klabeak ikertuko ditugu”. Egun horretan eta lokal berean, baina 19:30ean, Los Caballos de Düsseldorf (LCDD) taldeak kontzertua egingo du jostailuekin egindako instrumentuekin.
Martxoaren 16an, asteazkena, Enrique Tomasek instrumentu elektronikoen eta instalazio interaktiboen erakusketa egingo du, Sareanen, 19:00etan. Gero, 20:00etan, Tomasek kontzertua emango du.
Amaitzeko, martxoaren 17an, osteguna, Leioako EHUko Arte Ederren Fakultatean Tomasek tailer hori egingo du berriro, 11:00etan, eta gauean, 21:00etan, Bilboko Huracan 29 lokalean, Consumer Electronics (Philip Best, Sarah Froelich eta Russell Haswell) proiektuaren emanaldia izango da.