Bihar, hilak 18, abiatuko dute Donostiako Tabakaleran, Donostia Kulturak eta Euskadiko Filmategiak antolatu duten Nosferatu zinema-ziklo berria. Frantziako zinema beltza izango da protagonista urtarriletik abendura arte luzatuko den zikloan, eta hogeita hamar bat film proiektatuko dira.
Diogun moduan, bihar bertan izango da lehen emanaldia Fantômas: À l’ombre de la guillotine (1913) filmarekin. “Louis Feuilladek Krimenaren Enperadoreari eskaini zizkion bost filmetatik lehena, Fantômas pertsonaia mitikoari, alegia: Pierre Souvestrek eta Marcel Allainek sortutako pertsonaia. Oraingoan, Feuilladek lehena moldatzen du, 1911n idatzia. Sail onetan gertatu ohi denez, ekintza hiru ataletan banatzen da: Royal Palace Hôtelen lapurretak Fantômas erakusten du Danidoff printzesaren bitxien jabe egiten; Lord Belthamen desagerpena tituluak jasotako gertaeraren inguruan garatzen da, non haren emaztea, Fantômasen maitale eta konplizea, dagoen inplikatuta; Urkamendiaren inguruanen Fantômas nola atxilotu eta gillotinara kondenatzen duten kontatzen da.”
Horren ostean Dimitri Kirsanoffek zuzenduriko Ménilmontant (1926) filma eskainiko da. “Intertitulurik gabeko film ertain famatua, garai hartako abangoardiako zinemaren barruan sar daitekeena, baina ondorengo errealismo poetiko frantsesaren zenbait elementu aurreratzen dituena. Bi ahizpa (haien gurasoak hil egin zituzten) nekez bizi dira hogeiko hamarkadako Parisen, ia baliabide ekonomikorik gabe, eta gizon berarengandik tratu txarrak jasaten”.
Hortik aurrerako programazio guztia Donostia Kulturak dauka.
