Gipuzkoako Foru Aldundiak eta Kutxa Fundazioak bideratuko dute beste behin Katapulta Tour Gipuzkoa programa, musikako eta formatu txikiko arte eszenikoen proiektuei laguntzeko xedez.
Edizio berri honetan, programak bere hiru helburu nagusiak mantentzen ditu: “Gipuzkoako talentua musikan eta arte eszenikoetan nabarmentzea eta bultzatzea, bereziki, gazteriari; bertako eszena dinamizatzen laguntzea, klubei eta antolatzaileei lagunduz, eta prestakuntzaren alde egitea, profesionalizazio handiagoa lortzeko bide gisa”.
Deialdia artista profesional berriei edo erdi profesionalei zuzenduta dago, beren karrera musikan eta arte eszenikoetan profesionalki garatzeko interesa dutenei. Hainbat estilo onartuko dira, hala nola popa, rocka, folka edo hip-hopa, eta formatu txikiko arte eszenikoen proposamenak onartuko dira, baina horiek artisten jatorrizko lanak edo deialdiarentzat sortuak izan behar dute.
Profesionalek osatutako epaimahai batek kalitate, ibilbide eta proiekzio irizpideak hartuko ditu kontuan eta hamar proiektu aukeratuko ditu.
Proposamenak azaroaren 30era arte aurkeztu ahal izango dira, Gipuzkoako Foru Aldundiaren webgunean.
