Euskal Herria Zuzenean(EHZ) jaialdiak eta Baionako l’Atalante zine aretoak gaualdi berezia atondu dute gaur “musika korrontearen eragina oldartze mugimenduetan” gaiaren harira. Horretarako egitarau oparoa prestatu dute.
Hala, Kadjoo folk-rock taldeak emanaldia egingo du 20:00etan. Ordubete geroaroa, EHZ, E-tik Z-rat (Stéphane Ghislain / Frédéric Fersen ) dokumentala eskainiko dute. Filmak 1996an Arrosan sortu den EHZ Festibalaren historia kontatzen du.
Halaber, 21:30ean Le Premier Rasta ikusi ahal izango da. Howard Howell rastafari filosofiaren sortzailearen bizitza jasotzen du.
Amaitzeko, 23:00etan mahai-ingurua izango da 5 korronte, 5 ibilbide, 5 engaiamendu lelopean. Bertan, Euskal Herriko korronte ezberdinetako ordezkariek parte hartuko dute: Jon Eyherabide (MAK, Hip Hop); Eneko Labeguerie (Guk, euskal kanta); Jimmy Arrabit (King Mafrundi, Reggae); Emmanuel Clerc (Basque Electronic Diaspora), eta Beñat Lascano (Hurmurao).
Bestalde, aurtengo EHZ musika jaialdia uztailaren 1ean, 2an eta 3an egingo da, Heletan.