Hogeita hamar urtetik gorako ibilbidea duen Holandako The Ex taldeak kontzertua egingo du gaur, Azpeitiko Sanagustin Kulturgunean, 23:00etatik aurrera. 1979an jaio zen The Ex punk talde gisa. Hiru hamarkadatan, baina, bestelako osagaiak gehitu dizkio bere jarioari, jazza, Afrikako musiken eraginak edo inprobisazioa, besteak beste.
Post-punk oihartzunak barreiatzen dituzten gitarra angeluar eta zorrotzak dira The Ex taldearen ezaugarri nagusia. Horretaz gainera, taldeak 1.500 kontzertutik gora egin ditu ibilbide luze horretan, beti ere, modu independentean eta euren autonomia aldarrikatuz, autogestioaren bidetik.
The Ex ezagunak egin ziren gurean CNT sindikatuaren artxiboetatik berreskuraturiko Espainiako Gerra Zibileko kantuekin egin zuten diskoari esker. Lan hori 1986an argitaratu zen, eta 1997an berrargitaratu. Harrezkeroztik, The Ex punk anarkistarekin lotu da. Alabaina, eta kontu politikoak gorabehera, taldekideek aspalditik musikari eman diote lehentasun osoa. “The Ex da kontzeptu bat, ezta ideia politikoa ere, musika bere nahierara egin gura duen lagun talde bat da. Musikak dauka lehentasuna, alderik garrantzitsuena da”, dio Andy Moor taldeko jotzaileak.
Hala, holandarrek musikan jarri dituzte ahalegin guztiak, eta esfortzu horrek bere fruituak eman ditu. Izan ere, bere musika esparru askotara zabaldu da, jazzera zein Afrikako musiketara. Esate baterako, Brass Unbound jazz taldearekin jo dute, bai eta Getatchew Mekuria saxo jotzaile etiopiarrarekin. Azken horrekin disko gomendagarria ere grabatu dute, Moa Anbessa (txertaturiko bi bideoetan musikari horiekin jotzen ikus daiteke The Ex).
Aipagarriak ere badira, holandarrek Afrikan barrena egiten dituzten kontzertuak, beti ere, modu autogestionatuan. “Bira batean gaudenean, guztia low-cost erara egiten dugu, horregatik egin ahal dugu, antolatu egiten gara eta gogor lan egin. Ez dago beste modurik”.
2015ean, The Ex at Bimhuis (1991-2015), bilduma bikoitza; And so say all of us, DVDa eta bi single argitaratu zituzten.
Holandarrekin batera, Jupiter Jon euskal taldea arituko da. Gipuzkoarrek Eta metaforak greba egin zeben… (Bidehuts) disko berria aurkezteko. Grabazio horrek hamar doinu biltzen ditu: “Paleolitikoa eta gero Elvis kantuan entzuten diren rockabilly kutsuko oilo-onomatopeiak, Satanak piezako alboka, Navajo Kodigoan kantuko afrikanismoa, Ipar Poloko alkatea josten duten gitarra eta baxu angeluarrak, Festa komunista Genzano di Roman abestiko dub giroa edo Gansterrak operara doaz abestiko lirismoa”.
