Urteroko legez Zarauzko Photomuseumek 2015ko Argazkien Bilera martxan jarri du. Betiko legez, aurtengo edizioko erakusketa ere askotariko teknikak (ikatzezko-transferra, argazkigintza estenopeikoa, ferrotipia) eta genero fotografiko desberdinak (erreportajea, argazkilaritza artistikoa, natura- argazkigintza) osatzen dute.
Ekimenaren helburu nagusia, ohikoa den bezala, argazkigintzak dituen aukera zabalak publikora hurbiltzea izango da. Horretarako hainbat tokitan erakusketak antolatu dira.
Photomuseum aretoan bertan, Javier de Reparaz artistak, Nire haurtzaroko zuhaitzak zuriak dira izeneko erakusketa paratu du maiatzera bitartean.
Beste aldetik, Sanz Enea galerian, Jesús R. Jauregui artistak Argi eta itzalezko erriberak izenburuko lanak erakutsiko ditu maiatzera bitartean.
Eta azkenik, Zazpi Galerian, Portfolio Natural sailaren barruan, Abstract izeneko multzoa ikusteko parada egongo da.
