Bilboko Udalak antolatutako FANT-Bilboko Zinemaldi Fantastikoak bere 29. edizioa ospatuko du maiatzaren 5etik 13ra, baina horri begira hainbat ekimen antolatu dira jada.
Adibidez, jaialdiak Mitologika erakusketa aurkeztu du Barrainkuako Udaltegian. Aurrerago, beste hiru erakusketa aurkeztuko dira: Mitologia, sorginak eta magia, Deustuko Liburutegian; Sugaar eta munduko beste dragoi batzuk (Kobazuloetatik liburutegietara), Begoñako Liburutegian; eta Daniel Esteves Bilbao FormARTEeko artistaren Sin TiNtulo, Vía de Fuga Cafe-n. Gainera, FANT jaialdiaren aurreko jarduera gisa topaketa bat antolatu da DC Comics-eko ilustratzaile Jon Mikel Bañalesekin, euskal mitologiari buruzko rol jokoen jardunaldi bat. Eta Cine Club FASekin lankidetzan, Aitor Elorriagaren El Cometa eta Alberto Vazquezen Unicorn Wars filmak proiektatuko dira.
Orain ikusgai dagoen Mitologika erakusketa euskal mitologiako pertsonaia nagusien irudi-galeria bat da. Raquel Alzateren (Barakaldo, 1972) ilustrazioen eskutik sortu dira Zugarramurdiko sorginak, Mari jainkosa, Gaueko, Jentilak eta Basajaun, jainko, deabru, iratxo eta erraldoiak. “Mendeetan zehar iruditerian egon diren euskal mitologiako pertsonaien erakusketa honetako protagonistak dira, belaunaldiz belaunaldi transmititutako ehunka kontakizunen bidez. Ilustrazioen erakusketa honek antzinako izaki mitologikoei buruzko ikuspegi irudimentsu eta garaikidea ematen du”.
Erakusketak, gainera, Paul Urkijoren eta Nerea Torrijosen (zuzendaria eta jantzien diseinatzailea) ilustrazioak eta zirriborroak ditu osagarri gisa.
