Herenegun, urriaren 15ean, goizeko 11:00etan, eta Donostiako Kaxilda liburu-dendan, Mari Luz Esteban EHUko irakaslea eta idazleak, Jose Luis Padrón poetak eta Jose Angel Irigaray Pamielako ordezkariak, Ixiar Rozasekin batera, azken honen Beltzuria izeneko liburuaren aurkezpena egin zuten
Pamielak bidalitako oharrean honakoa irakurri dugu: ”Zer gertatzen da ahotsaren espazioan. Zer, ahotsa desagertu aurretik. Eta ondoren, ahotsa desagertu ondoren? Ahotsak mukuru egiten du, gainezka, gehikeria modura. Pentsamenduan beti gailendu da hitza. Hitzaren eta esanahiaren erreinuak itzala egin dio ahotsari. Hitzak ahotsa ilundu du. Esanahiak ahotsa kendu dio hitzari, haragia, gorputza ezabatu dio. Esanahiaren erreinuan hitza ez da eztarritik irteten, ezta gorputzaren tolesduretatik ere. Eta ahotsa orokortasunez izan da begiratua, ulertua, ikertua.Bakartasuna, besteekin bakarrak egiten gaituen bakartasuna, alboratua izan da, ertz batean geratu da”.
Beltzuria ahotsaren espazio politikoaren inguruko gogoeta da,horretarako bizitza istorio batzuk zeharkatzen dituelarik.
Ixiar Rozasek (Lasarte-Oria, 1972) narratiba, poesia, eszenarako testuak, testu kritikoak eta saiakera laburrak argitaratu ditu hainbat herrialde eta hizkuntzatan (Mexiko, Italia, Britania Handia, AEB, Portugal eta Eslovenia). Euskadi Literatura Sariaren finalista izan zen 2004 eta 2006 urteetan.
