Artekale Euskal Herriko Kale-arteen Elkarteak antolatu ohi duen Artekale Eguna urriaren 18an egingo da Hondarribin, eta ekimenaren hirugarren edizioa izango da, aurretiko bi edizioak Otxandion (2012) eta Zigoitian (2013) egin ziren.
Elkarteak jakinarazi duenez, aurtengo nobedaderik garrantzitsuena urriko ostiraletan egingo den kale-antzerki tailerra izango da. “Nahi duenak, euskal antzerkigintzaren profesionalekin batera, kale-antzerkiaren nondik norakoak ezagutzeko aukera izango du”. Tailerra Trapu Zaharrak konpainiako Santi Ugaldek eta Hortzmuga Teatro taldeko Raul Cancelok zuzenduko dute, besteak beste.
Ekimenak kalearekin loturiko makina ekitaldi bilduko ditu, hala nola, erakusketak, antzerki saioak, animazioa, edo tailerrak. Finean, kalearekin zerikusia duten hainbat diziplinaren erakustaldia izan nahi du Artekalek.
Hil honen amaieran, programazio osoa iragarriko du Artekale Euskal Herriko Kale-arteen Elkarteak.
