Bihar, hilak 21, film emanaldi interesgarria izango da Amasa-Villabonako Gurea Antzokian, 19:30ean hasita, Bost teilatu izenburupean.
Bost teilatu tituluak bost istorio labur bildu ditu, tartean, nork bere etxean Krak egin duten Ane eta Mirenen dolua; Ekaitz gazteak eta Inaxio edadetuak baserrian bizi duten katarsiak emandako Arnasa; Michellek jaioterrira itzultzean deskubrituko dituen Hitzak eta bere nortasunaren inguruko galderak; paketea dagokion teilatupera eramateko Erlojupekoa lehiatzen duen mezularia eta, azkenik, Muga inguruan bere buruaren babesteko ihesi doan Kamaru gazte afrikarra.
Krak filma Amancay Gaztañagak eta Erika Olaizolak zuzendu dute; Hitzak pieza Josu Martinez zuzendariarena da; Leire Egañak zuzendu du Erlojupekoa, eta Eñaut Castagnetek Muga; eta azkenik, Arnasa filma Raul Barreras zuzendariarena da.
Geuretik Sortuak ekimenetik jaiotako bost film laburren bilduma martxoaren azken egunetan estreinatu zen eta hainbat herritan modu ibiltarian izango da.
