Bilboko EHU eraikineko Chillida aretoak Jesus Jauregui artistaren Anthropos erakusketa hartuko du apirilaren 14tik maiatzaren 7ra arte.
Anthropos erakusketak “gizakiari buruzko ikuspegi berezia proposatzen du, gure existentziak eragiten duen harridurak eta osatzen gaituen “gorpuztasun zalantzagarriak” markatua”. Jaureguiren hitzetan, kalitatea eta kontrola soluzio plastikoan lantzea du helburu. Argiaren eta materiaren arteko harremana ilunpetik eta argitasunetik eraikitzen da, distira itsugarritik urrun, eta lurralde “mistiko, iradokitzaile, zalantzati, batzuetan itzaletik oso hurbil” batera hurbiltzen da, Maria Zambrano bezalako pentsalarien gogoetekin bat eginez. Erakusketak ikuslea “zerbait beste modu batean ikustera, bere burua deskokatzera, bertigoa sentitzera edo errealitate sakon komunaren beste ikuspegi bat aurkitzera” gonbidatzen du, azalpenerako baino esperientziarako espazioa irekiz.
Jesus Jauregui artista euskal konstruktibismoan trebatua izan da. Mexikon eman dituen hogeita bost urteek eragina izan dute bere obran, kolonaurreko kulturen, literaturaren eta neofigurazio garaikidearen erreferentziak lotzen dituelarik, egiturari, argiari eta materiari arreta zorrotza jarriz. Artistak bilaketa intuitibo gisa ulertzen du bere prozesua, behar intimo eta inkontziente batek mugitua, “erabat mentala eta kontzeptuala den lana”. Jarrera horrek, moda kontzeptualenen kontrakarrean kokatzera eraman du bere burua, intentsitate adierazkorrera jotzen duen pinturaren aldeko apustua eginez.
