Rekalde Aretoak, Jesús Pastor (Santurtzi, 1954) artista analitikoaren erakusketa inauguratu zuen joan den barikuan; 40 lan inguru bildu dira espazio horretan.
Hiru aldiz baino ez dugu bere lana ikusgai izan; elektrografiari lotutako ikerketak erakutsi zituen gaur egun desagertua den Bilboko Kale Nagusiko erakusketa-aretoan 1988. eta 1989. urteetan, eta Durangoko Arte eta Historiako Museoan, hurrengo urtean. Orain, bi hamarkada igaro ondoren, Rekalde Aretoak artistaren ibilbide osoa berraztertzen du, izan duen bilakaera ikusteko, bere garrantzia aztertu eta ebaluatzeko, eta adierazgarria den obra batekin gozatzeko.
Erakusketako komisarioa den Miguel Fernández-Cidek dioenez: “bere prestakuntza artistikoak bat egiten du izaera eraikitzaile, minimalista eta kontzeptuala duten proposamenen aldarrikapenarekin (…) Lan artistikoaren alde prozesualak pizten du bere kezka, eta zalantzarik gabe erakusten du, irudiak azaldu aurretik, aldi dokumental gisa, kontuen barneko funtzionamenduaren aztarnak edo frogak utzi nahi izango balitu bezala, esplizituki azaltzeko edo ezkutatzeko batere interesik erakusten ez badu ere. Erakarpena sentitzen duenari jakin-min hori asetzeko aukera uzten dio, besterik ez”.
Marmola, aluminioa, argazkiak eta abar paratu ditu erakusketa honetan. Marmolean zehaztugabeko irudiak edota erliebeak; marmol horrekin lotutako aluminiozko xaflak; prozedura mekanikoaren ehundura bereziak; material opakoak; beira gainjarriak eta pintatuak; liburu bateko orri zatiak zirkulutan mozturik; …
Jesús Pastorrek prestakuntza teoriko sendoa du, Filosofian lizentziaduna da Deustuko Unibertsitatetik, eta Arte Ederretako lizentziaduna Euskal Herriko Unibertsitatetik. Gaur egun, Marrazketako katedraduna da Vigoko Unibertsitateko Arte Ederren Fakultatean. Jakin-min handiko artista denez, geldialdiak egiten ditu irudiak aztertzeko, ondo menperatzea lortu arte. Horrez gain, ikerketan eta irakaskuntzan ere aritu da, eta, era horretan, onarpen nabaria eskuratu du bere lanbidean: Grabatuko Sari Nazionala irabazi zuen 1997an.
