Berriobeitiko Udalak Zubiak eraikitzen leloa duen kultur zikloa abiatuko du ekaineko lehen astean. Ekitaldi gehienak, doakoak, ekainaren 1etik 6ra bitartean ospatuko dira.
Ziklo honetako plater nagusia Sonakay taldearen kontzertua da, flamenkoa eta euskara nahasten dituen taldea. Sonakayk agerian uzten du “musikak ez duela muga idiomatikorik, musika kulturen eta hizkuntzen arteko zubia bihurtzen delako”.
Honetaz gain, eta bereziki publiko ez-euskaldunari zuzendua, Euskara maitatzen hasteko hitzak izeneko erakusketa antolatu da. Erakusketa honen helburua “hizkuntza ezagutzen ez duten pertsonak euskarara hurbiltzea da, hitzen berezien esanahian oinarrituriko ibilbide poetiko baten bidez”.
Ekainaren 2an, Iñaki Alforja zuzendariaren Biziprest Euskaraldiaren inguruko dokumentala ikusteko aukera egongo da. Hurrengo egunean, Gurerara bertsolaritza musikalizatua antolatu da Oskar Estangarekin. Bertsolaritzatik hartutako bapaterako tresnekin eta estilo ezberdinetako musika oinarriak erabilita (reggae, hip-hop, trap, flamenko, salsa…) momentuan publikoko partaideekin ateratako gaien, ideien, pertsonaien… inguruan kantak inprobisatzea izango da Oskar Estangaren lana.
Ostiralean, ekainak 4, ikus-entzunezkoak ere nabarmenduko dira euskarazko film laburren Laburbira galarekin.
Ekainaren 6an, Zirika Zirkusen Hemendikara azken ikuskizunaz gozatzeko aukera izango dute. Konpainia honetako kideak munduko hainbat tokitatik etorritako titiriteroak dira eta, egunero bezala, goizeko ariketak egiten hasi dira. Baina, bat-batean, hori ustekabea! Jendeak kanpamentua inguratu duela konturatu dira. Kirioak dantzan, emozioa! Aspaldi baitabiltza ikuslerik ikusi gabe.
Programazioaren gaineko zehaztasunak hemen kontsultatu ahal dituzue.
