Gaur, hilak 14, Bakardadeak lelopean, Bilbaopoesia Literatur Jaialdiaren XXIV. edizioa abiatuko da, eta martxoaren 23ra arte luzatuko da. Lehen egun honetan, Gioconda Belli idazle handiak errezitaldia eskainiko du Bidebarrietako Liburutegiko Areto Nagusian.
Egunotan bakardadea hainbat modutara islatuko da: erbesteratuak, errefuxiatuak, dueluak, gerren bakardadea, baita bilatzen eta desiratzen den bakardadea ere; eta definizio horietan murgilduko dira nazioarteko, estatuko eta tokiko hainbat idazle, bederatzi egunez literatura eta musika programazio iradokitzailea osatuko dutenak.
Eta diogun moduan, jaialdia Nikaraguan jaiotako Gioconda Belli poeta eta nobelagileak eskainiko duen Furiosamente Piel izenburupeko errezitaldiarekin hasiko da. Belli bere poesian eta bizitzan barrena ibiliko da bere bertsoen bidez.
Martxoaren 15ean, klasiko bat itzuliko da jaialdira, Blas de Oteroren omenezko hitzorduarekin. Poeta gogoratuko da Seroie Taldeak eskainiko duen kontzertu baten bidez, Cántico espiritual poeta ezagunaren lehen liburuaren argitalpenaren 80. urteurrenean. Seroie musika taldeak emanaldi honetarako bakarrik sortutako zuzeneko kontzertua eskainiko du.
Aipagarria ere bada martxoaren 19an (19:00etan), Lorcari eskainiko zaion tartea. Itziar Lazkano eta Felipe Lozaren eskutik, Iñaki Marurik pianoan lagunduta, Granadako poeta gogoratuko da.
Eta datorren astean, hilak 20, Loraldiarekin urtero elkarlanean, Castillo Suarezek bere azken poemarioa aurkeztuko du eta Juantxo Zeberiok musika jarriko die poema guztiei.
Poesiaren Nazioarteko Egunarekin batera, hilak 21 (19:00etan), Jaialdiko hitzordu garrantzitsuenetako bat programatu du: Raúl Zurita, Txileko poeta handienetako bat, Bilbon izango da.
Hori eta beste gauza asko poesiaren inguruan datorren astera arte. Bilbaopoesia Literatur Jaialdiaren eguneroko hitzordu guztien gaineko informazioa hemen kontsultatu ahal duzue.
