Zuberoako dantza tradizionaletatik abiatuta, eta Edu Muruamendiaraz koreografoaren zuzendaritzapean, Kompany Beritza taldeak Baküna Show ikuskizuna aurkeztuko du larunbatean, hilak 7, Donostiako Victoria Eugenia Antzokian, 20:00etatik aurrera.
Muruamendiaraz koreografoak ez ezik, Johañe Etchebest dantzari eta dantza irakasleak eta Catherine Arçanuthurry dantzari klasiko profesional ohiak ere parte hartu dute obraren sorkuntzan.
Dantza-ikuskizunak, hain justu, Zuberoako dantza tradizionala eta garaikidea uztartu nahi ditu; lau zatitan egituratzen da, eta Zuberoa moderno bat erakutsi nahi du.
Donostia Kulturaren arabera, “Kompany Beritzaren sorkuntza lana bi egitasmo hauetan sustraitu egin da; Zuberoako kultur oparotasunaren ildotik adierazpide berri eta berezi bat gauzatzea eta Zuberoako berrikuntzarako bideak irekitzea, kultur sustraietan oinarrituta”.
Honen harira esan behar da, bihar, osteguna, 11:30ean, prentsaurrekoa izango dela San Telmo Museoan, datorren larunbatean, hilak 7, ospatuko den Xiberoaren Eguna aurkezteko.
