Donostiako Echeberria galeriak Jon Landa artistaren kutsu inpresionistadun margolan koloretsuak hartu ditu abenduaren 10era bitarte.
Landaren lana errealista eta figuratiboa da. Hala, eguneroko ingurua (hiria, kaleak, errepideak…) argiz eta kolorez betetako une bihurtzen dira bere pintzelen bidez.
Argazkigintzatik gertu dauden lanak izanagatik ere, materialtasun handiagoa agertzen dute, Landak euskarria tratatzeko erakusten duen sotiltasuna dela eta. Hala, eguneroko uneak gelditzeko eta jendea, asfaltoa edo kotxeak, besteak beste, bizitasun osoz irudikatzeko gaitasuna duen artista da. Kolorearen saturazioa, argiaren efektuak eta pintzelaren keinuak dira bere baliabide nagusiak. Hori guztia bere adierazkortasunari esker lortzen du.
Landaren pintura kartsua da, materiaren eta kolorearen bidez, edozein gai detailearen eta adierazkortasunaren arteko oreka sotil bihurtzen baitu.
