Aurrerapenen denboraldia igaro du Ezezez taldea lan berria aurkezteko garaian: Naiz Irratia, Turbo 3, Radio3, Mondosonoro edo Radio Euskadi. Orain, jo eta fuego hasi behar du Katuzaldia euskarazko disko berria lau haizetara zabaltzeko.
Katuzaldia zortzi kantuek gorpuzten dute eta horietan reverbs, tronpetak, oihartzunak, autotunea, hits ezkutuak eta ekoizpen bikaina entzun beharko dituzue. Bilbotarrek bideo-joko sentsazioa duen disko bat kaleratu dute, eta abesti bakoitza esploratzeko gogoa ematen dizuen pantaila berri bat da.
Bateria anfetaminikoak, melodia ezkutuko gitarrak edo distortsioa duten baxuak entzungo dituzue, eta horri kantariaren ahotsa gehitu behar zaio, kolektiboa, lagunartekoa edo autoezagutza-prozesua ulertzeko duen moduan kantatuz.
Katuzaldia lanak beste koxka bat jarri du Euskal Herriko underground panoraman, punkari psikodelia emanez eta bestelako melodiak sortaraziz, espero zenituzten leloak alde batera utzita.
Hortaz, atzean geratu da pandemiaren osteko garaia, Unai Madariagak (ahotsa/gitarra) bere bakarkako lehen lana argitaratu zuenean. Esperientzia horretatik, eta Eneko Ajangizek (gitarra) ekoizle gisa zuen sinergiatik sortu zen Ezezez. Aste gutxitan Álvaro Olaetxea (Capsula) baterian hasi zen eta Mikel Irigoyen baxuan. 2022an bere lehen albuma argitaratu zuen: When I Think Something is Funny, I Smile. Argitaratutako disko bakar batekin taldeak bereganatu zuen prentsa musikalaren arreta (10etik 8 bat Mondosonoron, elkarrizketa bat Ruta 66-n, edo bere zuzenekoaren efikazia eta indarra erakusten dituzten bideoak EITBn) .
Do it yourself leloarekiko militantziak eta sormenak eraginda, 2023 amaitu gabe, talde bizkaitarrak bigarren LPa du prest. Beste behin, grabazioa, nahasketa eta masterizazioa bandak berak egin ditu. Eta bai, edizioa ere bai, eta bigarren lan honekin sendoago eta irmoago dirudien soinua eta irudia definitu ditu.
Parquet Courts, Viagra Boys edo Idles taldeen eraginak soma daitezke. Hala ere, 70eko psikodeliaren nostalgiatik grunge berritzaileraino denbora-lerro bat marrazten duten estra estilistikoekin ere jarraitu ahal da. Eta hori guztia, gaur egungo melodien eta gaien bidez, estigmarik gabeko punkaren potentziarekin indartuta.
Euskal Herriko errealitatean erabat berria da, eta froga gisa esan behar da banda bere lehen LParekin inguruko agertokietatik igaro zela, hala nola Katakutik (Bera), BBK live jaialdiaren programazio paralelotik, edo Kafe Antzokitik, diskoaren aurkezpen borobil eta izugarrian.
Datozen asteetan taldekideek euren armarik onenarekin egingo dute bira, eta betiko legez, modu bikainean hibridatuko dituzte zehaztasuna, dinamismoa eta irmotasuna.
Kontzertuetako datak honako hauek dituzue: Iragan asteburuan Ormaiztegin izan dira; abenduaren 7an, Ahotsenean izango dira; 15ean, Gernikako Parnason; 16an, Santanderren joko dute; 22an, Bilboroken. Eta urtarrilean eta otsailean kontzertu gehiago iragarri dituzte: Bakio, Xixon, Arrasate, Bermeo, Gasteiz,…
