Zuloak taldeak Izar & Star programaren laugarren edizioa irekiko du irailaren 7an Bilbon dagoen Campos Eliseos Antzokian. Izar & Star programa 2012an hasi zen, eta bertan Euskal Herriko taldeek euren artista kutunen kantuak edo diskoak moldatzen dituzte.
Zuloak bandaren kasuan, 70eko hamarkadan AEBetan eta mundu osoan ezagun egin ziren emakumez osatutako The Runaways rock bandaren errepertorioa aukeratu dute. Estatubatuarren kantu ospetsuenetarikoa Cherry Bomb da. Taldea Kim Fowley musikariaren gidaritzapean eratu zen 70eko urteetako erdi aldean. 2010ean, taldeari buruzko biopic-a estreinatu zuen zine aretoetan Floria Sigismondi zinegileak.
Gaur bertan, Fermin Muguruzak, Zuloak taldearekin Fowley-ren lana egin duenak, proiektuaren azken mugimenduen berri eman du Victoria Eugenia Prentsa Aretoan. Taldearen agurra, Japoniako bira eta Zuloaken filmak egin duen ibilbidea dira Muguruzak jorratu dituen gaiak.
Campos Eliseos Antzokian ondoko kontzertuak ere ikusi ahalko dira Izar & Star zikloaren baitan: urriaren 12an, Colectivo Letaminak hainbat talderen doinuak moldatuko ditu, tartean, Belako, Daft Punk, Queen eta Depeche Mod; 12an, Four Friends taldeak emakumezko jazz eta blues abeslarien doinuak egin ditu bere; eta 31n, Dr. Mahas’s Miracle Tonic bandak The Beatlesen Magical Mistery Tour izango du ardatz.
Azaroan bi hitzordu gehiago izango dira: PLV Havoc musikari donostiarrak, herrikide ziren La Buena Vida taldearen errepertorioa jorratuko du 16an, eta 21ean, Magic Teapot bizkaitarrak Kaliforniako rock azidoan murgilduko da.
