Dantza Zirkuituak antolatuta, Elorrioko Logela Multimedia eta Eindhovengo (Holanda) The Rugged konpainiek Bost Urban Show izeneko obra aurkeztuko dute datorren igandean, Arrasaten. Hiri-dantzak, soinuak eta argiak bat egiten dute Bost urban Show obran. “Energiaz, originaltasunez eta sinkronizazio koreografikoz betetako ikuskizuna da”.
Logela taldea arte-diziplina digital desberdinetako sortzaileek osatzen dute (bi musikari informatikok eta bi bideo-sortzailek). Produktu digitalak sortzea eta eszenaratzearekin bateratzea da Logelaren helburua. Mokaua multimedia ikuskizuna; Taupadak, euskal dantza tradizionaleko Kukai konpainiarekin batera; edo Circle of Trust konpainiarekin Papiro….Flexia dira bere proposamenak.
Gaur egun, mapping izeneko teknikarekin ari dira esperimentatzen, eta irudia eta soinua kasu bakoitzeko eszena-planteamenduarekin sinkronizatzen dira.
Beste aldetik, The Ruggeds breakdanceko munduko talderik berritzaileenetako bat da. Hein berean, bakarkako dantzaren mugimendu akrobatikoak ezin hobeki sinkronizaturiko beren koreografia originalekin nahasten dituzte.
