Azkuna Zentroak antolaturiko Gutun Zuria Jaialdiaren barruan Salda dago! erakusketa inauguratu da. Maiatzaren 14ra arte, Andrea Ganuza, Charlotte Gosselin eta Clara Chotil ilustratzaileen lanak ikusi ahalko dira. Erakusketa hori Azkuna Zentroa, Quebec-eko Maison de la Littérature eta Angoulême-ko cité Internationale de la Bande Dessinée et de l’image bultzatutako Komikiaren Nazioarteko Egoitzen esparruen barruan dago.
Azkuna Zentroak honela deskribatu du erakusketa: “Salda dago! lan handiarekin prestatutako hiru istorioz osatuta dago. Prozesuaren fase desberdinetan eginak dauden hiru “protolibro” ditu. Hirurak aldi berean “sukaldatuta”, osagai batzuk errepikatzen dira, adibidez, tipula eta baratxuri sofritu bat etxeko gisatu batean. Beste batzuk aldiz, berritzaileak izan daitezke, edo baita mingarriak ere: Arriskutsua al da juliana gorri gehiegi hori? Grafitozko marra horiek pixka bat kozinatuago egon daitezke? Lerroaren eta orbanaren arteko kontraste horrek ondo daude, edo irin pixka batekin hobeto lotuta egon daitezke? Hau ez da komiki tradizional bat, zapore berriak egostea baizik.”
Gutun Zuria Bilbao Jaialdia apirilaren 1era arte ospatuko da Idatzi/Editatu/Irakurri izenburupean, eta aurtengo edizioak idazketa, edizioa eta irakurketa prozesu beraren zati gisa aztertuko ditu.
