Literatura Eskolak aurrera darrai bere programazioan. Hil honetako hitzordua Donostian izango da. Ixabel Etxeberria mintzakide delarik, Piarres Lartzabalen antzerkigintzaz mintzatuko dira zaleak, otsailaren 21ean, 10:00etatik 14:00etara, Donostiako Ernest Lluch kultur etxean.
Bidegileak lanean horrelakoak idatzi dira bere pertsona eta obraren gainean: “Irri eginarazteko xedea besterik ez dute hastapenean Hazparneko bikarioaren Kontrabandistak, Lau donadoak, Ferrando, Dendarietan, Manez ohoretan, Eiherazainaren astoak, ala Xirrixti-mirrixti antzezlanek. Baina laster antzerkigilea eta jokalariak trebatzen eta ausartzen dira: irri eta negarren artetik, entzun-ikusleari zenbait gogoeta eginarazi nahi dizkio idazleak eta, bera ere bere hizkuntza zorrozten ari da: Hazparneko antzerki-taldearentzat azken urtean Piarres Larzabalek idatzi zuen Etxahun dugu lekuko (1951). Ondotik heldu dira, nolazpait erraiteko, Etxahun-en ildotik datozen lanak, gizarte arazoak harrotzen dituzten komediak, hala nola, Bordaxuri, Okilomendi, Nork hil du Oihanalde, Portu-xoko, Herriko bozak, Hila espos, Hiru ziren, Mugari tiro eta 50eko hamarkadan idatzi gehienak”.