Patxi Bisquerten opera prima Iruñeko Geltoki gunean pantailaratuko dute bihar, apirilak 2, 18:30ean. Emanaldiaren ondoren Patxi Bisquert zuzendariarekin solasaldia egingo da.
Azaroaren 30ean, Zizurkilgo San Millan elizan, Ombuaren itzala filmaren aurrestreinaldia izan zen. Proiektua crowdfunding bidez finantzatu da, eta Zizurkilgo Udalaren babes ekonomikoa izan du.
Patxi Bisquert aktore eta zinemagileak zuzendutako lanak Pello Mari Otaño zizurkildarraren figura du ardatz. Pieza zinematografikoak bertsolariaren azken 20 urteak narratzen ditu, 1890etik 1910era, “garai hartako testuinguru soziala eta gorabeherak islatuz”.
Argentina, Nafarroa eta Gipuzkoako hainbat tokitan filmatu da. Joseba Usabiaga eta Sara Cozar dira protagonistak, eta horiekin batera, Ramon Agirre, Maia O’Brien, Iñaki Beraetxe, Klara Badiola, Hodei Arrastoa, Asier Sota aktoreak aritu dira. Anjel Mari Peñagarikano eta Oihana Iguaran bertsolariak ere bertan agertzen dira.
Xabier Amurizak honako hau esan du Otañori buruz: “Figurarik beneratuena izatea ez da nik entzun izan dudan zerbait bakarra, nire bizitza guztian egiaztatu dudana baizik. Bai bertsozaleak, bai bertsolariak, bai, orohar, euskaldunak ere, benerazio horrekin hizketan entzun izan ditut beti Pedro Mari Otañoz. Aipatu benerazioa harrigarriago egin zitzaidan gero, bere bizitza ezagutu nuenean. Otaño, ideologiaz, liberala baitzen, kasu bakana eta nahiko harrigarria, haren garaian zebilen bertso tradizioan. Halere, Euskal Herri osoaren itzala irabazi zuen.”
Horren osteko emanaldiak Andoainen (apirilaren 3a, osteguna); Pasai Donibanen (apirilaren 4a, ostirala); eta Eskoriatzan (apirilaren 6a, igandea) izango dira. Apirilaren 15ean, Bilboko Kafe Antzokian ikusiko da, eta 29an, Bira Kultur Gunean.
