Irailaren 9tik 12ra munduko musikak eta kulturak batuko dira Getxo herrian Oysterband, Mahala Raï Banda, Laydsmith Black Mambazo eta Xabi Aburruzaga artistekin. Egitarauan bestelako jarduerak ere badira: Bidezko Merkatua, Munduko Terraza eta kaleko banden desfileak.
Eguneko eskaintza (Erromoko Santa Eugenia plazako karpan) arratsaldeko taldeen eta artisten emanaldiekin abiatuko da 19:00etan. Areetako Geltokiko plazako karpan kontzertu nagusiak izango dira 20:30etik aurrera, eta horiek amaitutakoan Munduko Terrazako saioen txanda izango da.
"Guztiz erroturik dagoen jaialdi ikusgarri baten aldeko apustua egin du Getxoko Udalak eta joan den urteko 25. edizioan batu ziren 30 mila ikusle gainditzea espero dugu" aipatu zuten antolatzaileek atzo Bilbon egin zuten aurkezpen-ekitaldian.
Horretarako Oysterband talde mitikoa ekarri da. Aipatutako taldea Britainia Handiko folk-rockeko talde ospetsuenetariko bat da.
Bigarren egunean, festa balkanikoaren txanda iritsiko da, Mahala Raï Banda taldearen eskutik. Jaialdia erdialdera iritsiko da larunbatean, Ladysmith Black Mambazo taldearekin. Hego Afrikako musika tradizionalaren erritmo eta armoniaz gozatzeko aukera bikaina.
Azken egunean, hilak 12, Xabi Aburruzaga trikitilariak amaiera bikaina emango dio Folk Getxo Jaialdiari, Denboraren naufrago azken lanaren aurkezpenarekin.
Bestalde, arratsaldeko kontzertuetan Extremadurako Barrunto Bellota Band, Circuito de Música Injuve zirkuituetan aukeratuta; Gaizka Baena euskal gitarra-jolearen flamenko-fusio proiektua; La Bruja Gata Madrilgo saltsa-taldeko jai kutsuko erritmoak eta, azkenik, Mexikoko Efeleson bandaren soinu latindarrak eta afro eta karibetarrak izango dira.
Eta gauez, Munduko Terrazan, Judith Mateoren (bere musika tradizio zeltatik eta Asturiaseko soinuetatik dator) eta Sevillako La Selva Sur banda egongo dira Getxo Folken.
Nontzeberri
