Isa Castillok eta Iratxe Retolazak koordinaturiko Genero-ariketak. Feminismoaren subjektuak artikulu-bilduma aurkeztuko da urriaren 10ean, ostegunean, 19:30ean Hernaniko Biteri Kultur Etxean. Aurkezpen ekitaldian Isa Castillok eta Iratxe Retolazak proiektu kolektibo honen nondik norakoak aurkeztu dituzte, eta ondoren, irakurraldiak, gogoetak, antzezpenak eta kantuak egongo dira Anari, Kattalin Miner, Josune Monton, Gorka Setien …eta beste lagun batzuekin.
Edo! argitaletxeak bidali digun oharrean hauxe irakurri dugu: “Genero-ariketak. Feminismoaren subjektuak testu-bilduma gorputz ikusezinak ikusgarri egiteko urratsa baino ez da, isilarazitako gorputzei ahotsa emateko saio txiki bat baino ez. (…) Liburuko parte-hartzaileei erreparatuta, gainera, esparru hauetan jorratu da, batez ere, feminismoaren subjektuen inguruko kezka: mugimendu feminista, unibertsitatea, artea eta literatura. (…) Egitasmo hau, azken batean, elkargune eta solasgune horien emaitza da, parte-hartzaileok mugimendu feminista, Jabekuntza Eskola eta Emakume Etxeetako sareetan ezagutu baitugu elkar.
Genero-ariketak liburuaren helburua ez da (trans)feminismoan ekarpen berriak egitea, ez eta testu esanguratsuenen bilduma egitea ere. Gogoeta egiten lagundu diguten ahotsak ekarri nahi izan ditugu, gure artean tailerrak, ikastaroak, hitzaldiak eta liburuak aurkezten izan diren feministak. Horregatik, esperientzia pertsonaletatik pentsamendurantz doan ibilbidea proposatu dugu.
Azken atal bat ere proposatu dugu, Glosategia. Pentsamendu (trans)feministan giltzarri diren zenbait kontzeptu bildu dira atal horretan, liburuan garaturiko iritziak, gogoetak eta pentsamenduak laburbiltzeko, horietan sakontzeko edo horiek auzitan jartzeko”.
