Bizkaiko Foru Aldundiak sustaturik, La Encartada Moda izeneko topaketa egingo da Balmasedako La Encartada Museo Fabrikan, maiatzaren 31n eta ekainaren 1 eta 2an.
Nazioarte mailako modako 20 profesional baino gehiago bilduko dira topaketan “abangoardiako ikuspegia eta, aldi berean, artisautzatik eta folklore tradizionaletik hurbil dagoen ikuspegia eskainiz”.
Jarduerak La Encartada Fabrikaren barruan burutuko dira, eta bertaratuko diren pertsonek “aukera izango dute desfileak eta showroomak ikusten dituzten bitartean fabrikako instalazioetan sartzeko eta XIX. mendean makinek nola funtzionatzen zuten esperimentatzeko”.
Bertan, oraintsu Assembly Graz (Austria) ekitaldian bildumarik onenaren saria irabazi duen Eder Aurre izango da; Betitxe eta Proyecto Hemen diseinatzaile bizkaitarrak ere izango dira.
Topaketan parte hartuko duten beste adituak Ane Takito, Fecal Matter kanadarra, Recrea2, Mari Makeda edo Truca Rec izango dira. Horietako batzuek hitzaldiak eskainiko dituzte.
Aldi berean, taldeen agerpenak eta esku hartzeak egongo dira, adibidez Las Masturbantes, Las Risas edo Elandorphium kolektiboen eskutik.
Egun horietan ere, La Encartadak eskaintzen duen esparru naturalean musika entzuteko parada ere egongo da.
Egunez eguneko programazio guztia, hemen begiratu ahal duzue.
