Munlet (Mendaro) eta Casual Hex (AEB) taldeek Bermeoko Beleza Malandra lokalean joko dute igandean, 13:00etatik aurrera. Gipuzkoarrek, gainera, oraintsu argitaratu duten Chupacabras izenburuko lan berria aurkeztuko dute.
Munleten diskoak pop elektronikoan eta after-punkean bustitako 14 doinu biltzen ditu, gaztelaniaz abestuak. Kantuok Mendaroko El Cubo estudioan grabatu, nahastu eta masterizatu ditu I. I. Saint-Gerons-ek. Diskoaren diseinuaz, berriz, Miguel B. Núñez arduratu da.
Casual Hex, bestalde, AEBetako Seattle hiriko hirukote gaztea da, eta post-punk estiloa jorratzen du, iluna eta angeluarra, ertzez beterikoa, baina era berean dantzagarria. Estatubatuarrek Fleshed Out izenburuko lana aurkeztuko dute.