Euskal ikus-entzunezkoak munduan barrena zabaldu nahi ditu ekimen berezi honek. Horretarako, sail ofizialetan aurkeztuko diren 21 pelikulez gain, euskal ikus-entzunezkoaren enpresa ugari biltzen dituen zinema proiektuen katalogoa banatuko du Donostiako Zinemaldian Basque Audiovisual markak, euskal zinema nazioartean ezagutarazi eta euskal produkzioei bultzada emateko asmoz.
Katalogoan, aurten estreinatu diren euskal filmak eta garapenean daudenak jasoko dira: 70 proiektu zinematografiko inguru, eta horietako 24, urte honetan zehar amaitu edota estreinatuko dira. Katalogo horretan, guztira, 50 euskal ekoizpen etxeren lanak jasoko dira.
Ekimena Zineuskadi, Etxepare Institutua eta Eiken Klusterraren lankidetzari esker sortu da eta berari esker, “euskal zinema nazioartean ezagutzera eman ahal izango da”, azpimarratu dute sortzaileek.
Era berean, euskal zinemagileei zuzendutako hainbat jarduera burutuko dira zinema jaialdiaren baitan. Koprodukzioen gaia jorratuko dute, horien artean Glocal meetsScotland topaketa. Screen Scotland erakundea izango da horren arduraduna eta irailaren 24an, “gaelikoan lan egiten duten profesionalen eta Europako hizkuntza ez-hegemonikoetan filmatzen duten ekoiztetxoen arteko elkarlana bultzatzea du helburu”, euskal zinemaren industriako enpresak tarteko: Abraprod, Amania films, Area audiovisual, Arena comunicación, Baleuko, Basque Culinary Center, Basque films,…, beste batzuen artean.
Eta irailaren 25ean, asteazkenean, Lau Haizetara Dokumentalen Koprodukzio Foroa ospatuko da, euskal emakume zinegileen ikusgaitasuna indartzea helburu duena. Foro hori, Eusko Jaurlaritzako Kultura eta Hizkuntza Politika sailak eta Zineuskadik bultzatutako ekimena da.
Ekimen horrek basqueaudiovisual.com webgunea jarriko du laster martxan, Euskadiko koprodukzio markoaren inguruko informazioa zabaltzeko.