Vari Caramés (Ferrol, 1953) argazkilariak ritmo mareiro, 1980-2012 izenburuko erakusketa jarri du Bilboko Rekalde aretoan. Erakusketa zabalik dago uztailaren 8ra bitarte, eta galiziarraren ibilbide profesionala biltzen du. Izan ere, erakusketak 30 urteko lana laburbiltzen du. Miguel Fernandez Cid da erakusketaren komisarioa.
Erakusketak denbora nola igarotzen den irudikatzen du, autoreak egin duen ibilbide profesional osoaren serie esanguratsuenak jasotzen baitira, 80ko eta 90eko hamarkadetakoak, hain zuzen ere, tartean, La movida viguesa, Coruña by Night, Castelos de Galicia, Compostela eta Visión animal. Argazki horietan zuri-beltza, eskala txikia eta tonu sepiak nagusitzen dira.
Gero, 1990. urtetik 2000. urtera bitarte, Caramés kolorearekin hasi zen lanean. Garai horretako serieak dira, Miraxes, Tránsito, Escenarios eta Recreo.
Aipaturiko serieetatik at dauden argazki solte batzuk ere ikus daitezke erakusketan.
“Moda eta joera guztietatik urrun, egunerokoa eta arrunta izanik ohiz kanpokoa izan daitekeen zerbait lortu nahi du (Caramések), normalean inor ohartu gabe gertatzen diren garrantzi txikiko gauza horietako bat. Ikusleei gauzak iradoki, gogora ekarri, amets eginarazi nahi die”, irakur daiteke Rekalde aretoaren webgunean.
