Aste honetan izan da Hernaniko Antzerki Zikloa, eta gaur berton azken saioa izango da. Guztira hiru antzezlan ikusteko parada egon da. Lehena Huts teatroaren Atzerrian lurra garratz obra izan zen, atzo, El Mono Habitado konpainiaren ¡Ave osos! eskaini zen gaztelaniaz, eta azkenik, Tartean Teatroren Ez dok ero antzezlanak itxiko du ekitaldia. Eusko Jaurlaritzak hartutako neurrietara egokitzeko aurreratu egin da saioen ordutegia, eta 19:00etan.
Gaurko saioaren harira, lan horrek euskal kultura, euskal antzerki eta euskal gizartearen irudi deformatua, barregarria eta haluzinatua eskainiko du. Ikuskizunak honakoa kontatuko digu: Mikelote eta Pantxo bikote artistikoa desegin da. Haien formula komikoa gastatua zegoen, eta belaunaldi berriek haien tokia okupatu dute. Pantxok ondo hartu du behartutako erretiroa. Eskenatokietatik urruntzeko gogoa zuen aspalditik, bizimodu lasai eta normalizatua desiratzen zuen, artearen eromenetik urrun. Mikelotek ez du bukaera onartu nahi. Antzerkiaren pozoia sakon errotuta dago bere zainetan. Eta pozoi horrek burua galtzeraino eramango du. Egun batean Mikelote, antzerkilari andante estrafalarioa, Pantxoren bila joango da, trasteak prestatu eta Euskalerrian barna joateko, herriz herri antzeztera, “Euskal Antzerkiak Behar Gaitu” uste inozoarekin. Horrela ibilbide fantastiko bat egingo dute Euskal Herrian zehar, hamaika abentura ero biziz.
Patxo Telleria eta Mikel Martinez dira protagonistak, eta Jokin Oregi da obraren zuzendaria. Telleriak esan duenez, “Ez Dok Ero fikziozko istorio bat da, baina errealitatean ditu sustraiak ondo erroturik. Autoreferentziala da neurri handi batean. Mikel eta Patxoren autofikzioa hor dago denbora guztian, geure buruaz barre egiteko ironia handiz eta batere gupidarik gabe. Eta gure buruaz ez ezik, gure gizarteaz ere egiten dugu barre, eta euskal kulturaz eta, nola ez, euskal antzerkiaz”.
