Bulegoa z/b erakundeak Urak Dakar egitasmoa antolatu du egunotan, Guggenheim Bilbao Museoan, Zinebiren 64. edizioaren baitan eta EHUko Bizkaia Aretoan.
Urak Dakar proposamena Space is The Place/The Place is Space egitasmoaren baitan kokatzen da, eta “betetzen ditugun espazioak eta bizi garen moduetan gertatzen ari diren aldaketa azkarren aurrean sortutako ardura partekatu bati erantzun nahi dio”.
Bere helburua da “arteak praktika kritiko gisa duen zeregina aztertzea, tresnak eskaintzen baititu geratzeko, begiratzeko eta munduan kokatzeko. Egoerak sortu, eta bizitzeko eta espazioa ekoizteko moduak irudikatzeko.”
Horretaz guztiaz hausnartzeko, bai maila lokalean nahiz nazioartekoan erreferente diren zinemagile, artista, pentsalari eta idazleak gonbidatu dituzte, tartean, Kodwo Eshun, Louis Henderson, Irati Gorostidi, Arantza Santesteban, Denise Ferreira da Silva, Arjuna Neuman, Sofía Montenegro, Josu Bilbao, Pablo la Parra, Rachel Weiss, Sara Alberani & Marta Federici Itziar Okariz, Giulia Crispiani eta Patrizia Rotonda.
Hortaz, Urak Dakar ekimenak, Zinebi 64ren baitan, Guggenheim Bilbao Museoko Auditorioan, zinema programa eskainiko du azaroaren 16an, eta azaroaren 18 eta 19an, Bizkaia Aretoan hitzaldi eta performanceak egingo dira.
Urak Dakar programaren baitan emango diren zinema-programak eta topaketak “estrategia afrofuturista hau dute oinarrian: denborazkotasunak desordenatzen dituen tresna gisa erabiltzea fikzioa, historiaren irakurketa berriak eskaintzeko”.
Ekimenaren nondik norakoak: Urak Dakar programa.
